بالبداية أول ماقدمت حطيت الرغبات على أساس أقرب فرع لي وهو جدة وكنت أتوقع أقبل فيه ولكن جاني القبول فالظهران .. ما أعرف آليه التوزيع ولكن "ممكن" لأن الظهران ورأس تنورة فيها سكن للطالبات ممكن عشان كذا كان توزيع أغلب البنات في هذي المنطقتين🤷🏻‍♀️.

فترة تدريبي كانت ١٠ أسابيع .. بالنسبة لي أول أسبوعين تقريباً كانت للتأقلم على وضع جديد، ثقافة جديدة، ناس جدد وحتى مذاهب مختلفة.. كل شي كان مختلف كلياً بالنسبة لي بالإضافة لأني أول مرة أجرب بيئة عمل فعلية..

أول أسبوع كان عبارة عن لقاءات تعريفية بيننا إحنا والموظفين كان بالنسبة لي ضياع من كثر الناس وكل شخص يعرف بنفسه سواء موظفين أو طلاب زينا 😂 ما أعرف أحفظ مين وأخلي مين.. بعد الأسبوعين هذي تأقلمت على الوضع وبدأت افهم الشغل والأشياء الي كانوا يشرحونها لنا..

طبعاً أنا بصراحة كانت لغتي متوسطة ولكن التحدث كان أقل من متوسط بسبب عدم الممارسة، من البداية وضحت للمشرفين إني درست بالعربي ولغتي مو ممتازة ولكني أفهم بعض الكلام ..هم الله يسعدهم مره تفهموا هذا الشي وصاروا يقولون لي أي شي ماتفهمينه من كلامنا إسألي وعادي بنشرح لك بالعربي...

بالبداية كنت أستحي أسألهم كنت أتوقع إن سؤالي ثقيل عليهم ولكن إكتشفت بعدين أنه أنا بس الي أحس كذا ولكن هم كانوا يفضلون الشخص الي يسأل ويناقش ويحاول يتعلم 🌚🤍 فعشان كذا لا تستحون 😂🤍

مكان تدريبي كان جداً كويس الحمدلله ولو إني سمعت بعض الطلاب كان مو عاجبهم المكان الي هم فيه ومافيه شغل ولكن بالنسبة لي الحمدلله توفقت في مكان التدريب 🤍.

أغرب شي شفته في بيئة العمل إن كل الموظفين ينادون بعض بأسمائهم العادية بدون أستاذ أو دكتور 😅 ولو فيه أحد كبير ينادونه أبو فلان... برضوا كانوا يعاملون الطلاب المتدربين ويسمعون منهم زيهم زي الموظفين وهذا شيء جمييل جداً صراحة بعكس أغلب أماكن التدريب يحسسون المتدرب أن ماله رأي..

اما بالنسبة لسكن الطالبات فالظهران.. جربت الفردي "القديم " مبنى 1612-203🥺 وجربت مع الروميت "الجديد" مبنىB212-JH-09🤍 مميزات وسلبيات كل واحد منهم: الفردي شوي من داخل قديم ولكنه مرتب أما بالنسبة للثاني مع الروميت كان المبنى جديد وكل التشطيبات جديدة كان شرح أكثر من الفردي..

-القديم قريب من لولو ماركت وستاربكس والحدائق بالكثير ٥-٩دقائق مشي وأنتِ واصلة بعكس الجديد تحتاجين تروحين مع الباص يوديك ويرجعك وإذا مشى عليك الله يعينك تدبرين نفسك🤦🏻‍♀️ وإذا بتمشين كان يطلع لي في قوقل ماب ساعة مشي 🏃🏻‍♀️ *الباص كان يودي مرتين فاليوم عند لولو وستاربكس*

مميزات السكن الجديد أنه فيه غسالة ملابس ومجفف خاصة لكل شقة (أنتِ والروميت) بعكس القديم كانت غرف غسيل في الدور تخدم بنات الدور كامل.. برضوا أهم ميزة بالنسبة لي في السكن الجديد وهي توفر غسالة مواعين كانت تفك أزمة إذا طبخنا🥲..

ولأسف أسوأ طعم موية ذقته في حياتي كان بالشرقية الواحد بالعافية يتوضأ ما أدري صراحة إذا كل البيوت كذا ولا ايش بالضبط طعمها كلور على ملح 🤕 وطبعاً فالسكن كلهم الجديد والقديم كان فيه بالمطابخ ٢بزابيز واحد منها مفلتر طعمه حلو والثاني 🤕...

وآخر شي بالنسبة للبنات ..المطبخ كان مجهز بكل شي قدور، صحون، ملاعق، سكاكين، غلاية وكلها جديدة بالإضافة لأنهم موفرين مفرش سرير جديد واستشوار هواء و مكواه صغيرة.. أما بالنسبة للاولاد مو متأكدة ولكن سمعت أنه بدون شي فقط الأساسيات الي هي بتوقاز وثلاجة وسرير وباقي الأثاث✨.

وأخيراً إن شاء الله ما أكون نسيت شي + أي سؤال أنا حاضرة وأتمنى تفيد الي بيتدربون في السنوات القادمة ..حبيت أكتب تجربتي لأن أول ماقدمت وأنقبلت مالقيت أحد أسأله كيف الوضع ومنها كمان تبقى ذكرى حلوة♥️.

@asm5ii مساء الخير اسماء بسالك كم كان معدلك لمن انقبلتي ؟؟

@a71954364 المعدلات كانت متفاوتة بين المقبولين أهم شي يكون زي الشروط الموجودة بالموقع ٢.٥ من ٤ أو ٣.٥ من ٥

@llxx123 مايطلبون CV ولا مقابلة ولا أي شي فقط نسخة من أخر سجل أكاديمي+نسخة من خطاب التدريب من الجامعة+نسخة من بطاقة الأحوال ..أهم شي تستوفين الشروط المكتوبه بالموقع

@asm5ii الله يسعدك ويرضى عليك شكرا 🤍🤍🤍🤍

@asm5ii ممكن تفتحين الخاص بسألك كم شيء🤍

@asm5ii وش تخصصك