بالبداية الشروط زي ماكانت موضحة بموقعهم الرسمي👇🏻 فترة تدريبي كانت ١٠ أسابيع بالنسبة لي أول اسبوعين تقريبًا كانت للتأقلم على وضع جديد، ثقافة جديدة، ناس جديدة وحتى مذاهب مختلفة كل شي كان مختلف كليًا بالنسبة لي بالإضافة لأني أول مرة أجرب بيئة عمل فعلية.

اما بالنسبة لمدينة التدريب فهي مع الأسف غير إختيارية هم يحطونك بالمكان اللي يحتاجونك فيه بالإضافة خلال التسجيل في احد الاسئلة تتيح اختيار اقرب مكتب توظيف وهذا فقط عشان تروح تستلم البطاقة، فلازم تختار المدينة اللي انت فيها مو اللي تبغى تتدرب فيها

أنتهينا من فترة التسجيل ونجي لمرحلة القبول أرامكو راح ترسل القبول اولًا عن طريق رسالة نصية ومن ثم ايميل موضح فيه اجراءات إتمام القبول والعقد بموعد محدد وفي حال انتهت المهلة وما أرسلت موافقة العقد يعتبر القبول المبدئي ملغي لذلك انتبهوا على الفرصة لاتضيع عليكم

بالنسبة لطبيعة العمل في أرامكو كل سوبرفايزر يسوي خطة تدريبية للمتدربين توضح كل اسبوع ايش المخرجات والمهارات اللي راح يتعلمها المتدرب وراح يصير فيه زي الديدلاين للشغل اللي راح يسلمك فيه السوبرفايزر

انا تدربت في قسم كل شغله يخص تخصصي " المالية" فكنت مبسوطة اني جالسة اتعلم شيء انا حابته وكل شيء كان يواجهني صعب او جديد عليا كان المشرف والتيم كله داعمين ومتساعدين ومتحمسين يعطونا tasks فكان دايمًا عندنا شغل نسويه وشيء جديد نتعلمه وهذا اللي خلاها تجربة مثرية جدًا

بعض من مزايا التدريب: ⁃ مكافأة شهرية ⁃ سكن او بدل سكن حسب حالتك ⁃ تأمين طبي -كورسات مجانية بشهادات معتمدة من أرامكو وجامعة هارفارد اما بالنسبة لأوقات الدوام: من ٧ ص الى ٤ م 🕓

في الاجتماعات بيسألونك عن رأيك ويعتبرونك جزء من التيم ويمكن هذا أكثر شيء ممكن يشجعك انك تدخل معهم في الشغل أكثر وتكون مستمتع فيه🌟!

وبالنهاية التجارب مختلفة اكيد من شخص لشخص لأنها تعتمد على المكان والتيم اللي يشتغل معاهم أكثر شيء، وتجربتي مختلفة تمامًا عن تجربة اي شخص آخر الله يكتب لنا ولكم الخير ويوفقنا جميعًا🙏🏻

@ifatima_Y في اي منطقه تدربتي ؟ انا نفس تخصصك

@idode__ منطقة جازان

@ifatima_Y شكراً مره لنقل تجربتك 🙏🏻💕، البطاقه لو كنت ساكنه بمدينه بعيده جداً ولا فيه اي فرع قريب كيف ممكن استلمها ؟

@emani1111 العفو💗، الحل لو كان مقر تدريبك قريب له مكتب إصدار البطاقات استلميها بنفس اليوم اللي تبدين فيه دوام بس قبل تسوين هذي الحركة كلمي الدعم الصباح وغيري موعد الاصدار

@ifatima_Y السلام عليكم، انا انقبلت وارسلوا لي تاريخ اصدار البطاقه. لكن محتتاااررره جداً 😢 ماعرف اخاف يكون صعب وبرضو ماعندي خطاب من الجامعه ومدري كيف للحين مارفضوني! واساساً التدريب مو اجباري بخطتي ف كل شي متلخبط عندي

@Layanihv وعليكم السلام، مبروك القبول♥️ سبحان الله هذا نصيبك ورزقك جاك لين عندك رغم استحالة الأسباب انتبهي ان خوفك يضيع عليك فرصة ماتجي الا مرة وحدة كتدريب جامعي في أرامكو خليك على ثقة بالله انها بتكون تجربة جديدة جميلة باذن لله واذا كان ترددك وخوفك مأثر عليك بنسبة كبيرة الأفضل تستخيرين