هندز | Hind’z 🎙🥈
@hindz5544
يقول صاحب عقار في مرة جاني واحد يبي يبيع أغلى مايملك بيته ، والبيت من البيوت إلي على الطراز القديم إلي له أكثر من 30 سنة!! سألته عن سبب البيع قال منحد أبي أسدد الديانة،قبلت وقعد البيت عندي حول 8 شهور محد تكلم فيه بعدها جاني واحد وسامه بحول 350 ألف كلمته مباشرة وقال نصيبه ..!
تنويه:ليس لي أي علاقة بأي حسابات أخرى تقوم بسرقة القصة واستغلالها لاغلاق حالة احسان بمقابل مادي أو اقتباس لاعلانات مدفوعة!! حساباتي الشخصية موحدة في كل البرامج hindz5544وليس لي أي حسابات أخرى! ولا أحلل سارقي القصص ونسبها لهم من قبل هذه الحسابات وتشويه سمعتي!! عليه جرى التنويه🛑🛑
جاني المكتب ونبيع البيعة ويجي وقت الإفراغ ، وبعد خمس ، ست أيام يجي صاحب البيت إلي شراه لمي بالمكتب ، وتعرفون بعض الجماعة يوم تشتري شيء وقديم يقولون كان زودت عليه كذا وأخذت أفضل، هذا مو زين ، هذا قديم ويعيبونه ويكرهونك فيه !! خوينا هالشكل ويقعد يتحلطم أنا شبوا علي أخواني وقالوا ليش تاخذه وكرهوني فيه ، قلت له خذه وخلني أنا أبيعه لك ، قال لا ، رجعه لأن راعي البيت ماصرف الشيك باقي ..!
يقول راعي المكتب أنا متفشل أدق على الرجال بعد ماتمت البيعة ، بس هذا نشب بحلقي وماطلع من المكتب يتحرى أكلمه ، والله البلشة صدق .. يقول دقيت على الرجال *ألو ، السلام عليكم .. وعليكم السلام *أنت حولي يا أبو فلان ؟؟ قال أيه والله إني حولك .. *قلت أجل مرني بالمكتب الله يسلمك قال ابشر وشوي إلا يلبق سيارته ويدخل وما أمداه يسلم إلا يتناوله هالمطفوق الله يصلحه وينشب له ..!!
تعال تعال أنت ماسحبت الدراهم وأنا مابي البيت برجعه لك وأبي دراهمي و و و !!😳 يقول أنا قلت الآن بيصفقه وتصير هوشه ويقول له توكل ما لك شيء ؟؟ هنا تفاجأت إلا يقول له ارتاح وش السالفة وسع صدرك تركد .. أصلا يوم خذيت الشيك حطيت بنفسي إني ما بصرفه إلا بعد عشرة أيام ، لأن كل ماجيت أروح البنك بصرفه يجي شيء ويصدني عن صرفه وش هو ما أدري ..!
يقول صاحب المكتب أنا أناظر وساكت ومصدوم وش هالطيبة وش هالسماحة فيه تبارك الله ، إلا ويرد ويقول صاحب البيت الأساسي يافلان تدري شلون ؟؟ ألغي البيعة وتمم يستاهل .. وتنلغى البيعة وياخذ هذاك الشيك ويروح ، وأقوله شف يا أبو فلان .. شفت فعلك الطيب ذا ؟ وابتسامتك ذي ووجهك السمح الهين اللين ؟؟ إني والله ولك عهد مني إني أنا إلي براكض وراء مكاتب العقار بالصك حقك ذا وبدور لك البيعة الطيبة ،، هنا رد علي برد وصدمني أكثر ..!!
قال الرزق يسوقه الله ، لكن صدقني إن الله ماكتبها ولو كتبها الله بتجي في حينها .. قلت ونعم بالله وطلع .. يقول والله ويقعد عندي الصك حول 8 شهور ثانية ما أحد يبيه ولا يدوره عشان طرازه القديم ، وبعد 8 شهور ويدق علي الرجال سلام عليكم .. * وعليكم السلام البيت سيم ؟؟ قلت لا والله إنه ماسيم والسموحة إلا ويقول خلاص وقف وقف !! وش السالفة !؟ قال البيت طاح بطريق الملك عبدالله إلي ببريدة وبيجيني تعويض .. ويقول صاحب العقار وسبحان الله يعوضه ربي بدل ال350 ألف وصبر الشهور بملايييين لقناعته ورضاه وسماحة أخلاقه …!!
الخلاصة من القصة : الرضى والقناعة كنز ثمين لو حصلت عليه احمد الله واشكره على هذه النعمة .. الرجال عمل بسنة الرسول عليه الصلاة والسلام وكان سمح في البيع والشراء .. الله سبحانه دبر له أمر خفي في شيء كان يبيه وربي صرفه عنه لخير أفضل منه ( وعسى أن تكرهوا شيئا وهو خير لكم ) ..
في حال ودكم تشاركوني قصصكم الحقيقية إلي حصلت لكم ، بشرط " تكون قصص فيها تفاصيل وعبر" شاركوني عن طريق الخاص في X أو ىىىنابي .. ادخلوا حطوا قصصكم فقط وراح أشوفها .. وكذلك عندكم التيل كل يوم نحط سؤال جديد لفقرة وتفضفضون فيه بسريه http://tellonym.me/hindz5544
مرحبا أنا هندز معلقة صوتية ، وكاتبة محتوى ، وهذا سنابي أقدم فقرات وسواليف يوميًا وقصص متابعيني ، وألعاب ذكاء فنانة الحقوها يشرفني تتابعوني وتدعموني لأقدم الأفضل أحبكم 🫂 ، تفضلوا الرابط 👇🏼🔥 https://snapchat.com/t/CZ7kEPR...