اول حاجة خاصنا نعرفوها هي أن المنتقدين انواع .. كاين الي فاهم شوية كورة او كيجتهد باش يفهمها، و كيحلل بناءا على الي كيشوفو في الماتش و كيعتمد على بزاف ديال Les Facteurs ! و كاين الي على قدو ف كورة و كيتسنى حتى يشوف الخسارة او الاقصاء عاد يخرج يسب و عاير و يطالب بالتغيير !

و كاين الي ما مسوقش و كيجي يهاجم و ينتقد لأسباب عاطفية او شخصية .. و طبعا كاين الي كيطبل و يدافع بكل الطرق "المستفزة" لمصالح شخصية و حتى هادو معروفين و مكشوفين من زمان. اذا، شوف انت فين واقف و غادي تعرف راسك اكثر مننا .. فين واقف غادي تسهل عليك تفهمنا في التغريدات الي جاية.

شخصيا، ما عندي اي مصالح، و الي متابع كتاباتي منذ سنوات عارف هادشي و بدليل كنت أول او من اوائل من طالب برحيل خاليلوزيتش في عز انتصاراته قبل CAN، لأن المبدء عندي واحد مع الجميع .. و حتى وليد طالبت ببقائه بعد الاقصاء ضد جنوب افريقيا، للاستقرار مع امل التطور و تصحيح الاخطاء !

و لكن بناءا على الأداء المقدم و كل ما يخص التكتيك، و بناءا على استراتيجية الاختيارات و نوعية الخصوم و الظروف العامة للمقابلات، كنشوف ان انتقادي للمدرب موضوعي و شرحت الاسباب. درجة التطور و الي تم تقديمه منذ المونديال مع مدرب خدام في ظروف مثالية لثلاثة سنوات، لا يبشر بالخير ..

و رغم ذلك ما طالبتش لا بالتغيير و لا برحيل وليدو ما فكرتش اصلا في الموضوع، لأنني ببساطة اعلم ان الجامعة ستستمر معه للCAN و بالتالي ما كاين لاش نضيع مجهود فشيء شبه مستحيل يوقع ! من الاحسن نركز في السلبيات والاخطاء و نتمناو التطوير يتحقق في الفترة المتبقية القادمة.

أجي نهضرو بصيغة مباشرة اكثر .. واش الركراكي مدرب سيئ فعلا !؟ لا، غير هو كينتمي لفئة تدريبية ربما ما عندهاش مستقبل في كرة القدم العصرية ! و لكن هاد الفئة كانت و باقا قادرة تحقق القاب، و قادرة تلعب بانظمة لعب مختلفة و وليد سبق و لعبها في تجاربه السابقة (3-4-3 / 4-2-3-1 و غيرها)

و من مميزات وليد، انه كتجارب سواء كلاعب او كمدرب عندو ما يكفي من الخبرات القارية باش يكون مطالب باستغلالها في الCAN اضافة الى بروفايل وليد عامة، بالنشأة و العقلية و باللغات الي كيجيدها فهو قادر يخلق خطابات مباشرة مع كل لاعب بلغته باش يوصل ليه فكره و باحساس كبير في la motivation.

و بالتالي عامة، تواجد وليد كمدرب للمنتخب المغربي 🇲🇦 يبقى مفهوم .. و لكن بالنظر لكل ما سبق، هو مطالب بتقديم مستويات افضل و طمأنينة افضل من حيث الاداء و الرؤية العامة في الاختيارات و الاستقرار ! تكون من فئة تدريبية معينة، ما كيعنيش تولي مدرب عشوائي يعتمد على الصدفة.

كخلاصة .. وليد الركراكي ولا وصل لكأس افريقيا برؤية فنية و تقنية، و برؤية واضحة متعلقة بالاختيارات البشرية، فيمكن المنافسة بقوة ! و لكن لغاية يونيو 2025 وليد باقي ما وصلش لهاد المرحلة .. باقي كتحسو كيقلب و ماشي حتى بطريقة علمية او بثقة في أفكاره.

وليد قادر يربح كأس افريقيا و لكن باش يربح خاصو يرفع المستوى، و تكون القوارق مع خصومنا واضحة و نبانو في الملعب افضل. و باش يترفع المستوى، خاص اجتهاد اكبر و تشتغل اكثر في تقييم المرحلة و تكون شجاع باش تدير مجموعة تغييرات و تصحيحات في عدة اوراش تكتيكية او في الاختيارات البشرية.