حياتك كدكتور بعد الكلية مختلفة عن حياتك كطالب في الكلية من حيث كل حاجة خاصة المذاكرة، أنا عارف الخلفية اللي معظم طلبة الطب خارجين منها ألا وهي "البصمجة" إلا طبعا قلة قليلة قررت سلوك مسار مختلف.

طلبة الطب بينقسموا لفئات: - منهم اللي كان بيذاكر الكام محاضرة من سلايدات الدكاترة أو الملازم المعمولة من الباوربوينت بتاع الدكاترة وبيعرف كل دكتور بيحب ايه وبيبصمج ملفات معينة دا بيدخل يجيب درجات كويسة ويعمل ترتيب.

- ومنهم اللي مكنش بيطيق يذاكر من ملازم مش مترتبة ولا باوربوينت فيه جمل غير مشروحة أو متناسقة وعنده مبدأ إنه مش هيبصمج وكان بيتجه للكتب الأجنبية والكورسات الأجنبية عشان كان عايز يتعلم كويس من البداية وعشان مبيذاكرش من المحتوى اللي الدكتور بيشرحه فمش بيرتب ومش مهتم بالدرجات.

مفيش حد فيهم غلط.. ويا ريت منفهمش الموضوع بسطحية إن كل اللي بيجيب درجات وبيرتب بصمجي.. لا فيه منهم ناس عباقرة، دا صح ودا صح وكل واحد عمل اللي هو مقتنع بيه، اللي كان همه إنه يرتب عشان يبقى ستاف صح.. واللي كان همه إنه يفهم ويتعلم كويس ومش حابب يبقى ستاف صح برده، المهم بعد التخرج.

السواد الأعظم حاله كالتالي: أنت بقالك 5 سنين بتبصمج ومش فاهم أغلب اللي درسته ولو جالك بيشنت في المستشفى هتقف عاجز قدامه، فيا عزيزي الطالب الغلبان يؤسفني أقولك هتحتاج تبدأ الطب من الصفر بعد التخرج، بس المرة دي بتذاكر لنفسك بروقان من غير ما يبقى عليك ضغط امتحان.

أنا عارف إنك داخل على حياة جديدة وتايه، اللي هيبقى تايه هو اللي مكانش بينزل المستشفى في فترة الكلية لأن اللي نزل بدري خلاص خد الصدمة أنت كدكتور فريش هتعيش مرحلة الصدمة دي أول 3 شهور فأنا بحاول أوفر عليك وأقولك العقبات اللي وقفت في وش الناس الأكبر واللي في امتياز.

هتكتشف وأنت في رحلتك في الحياة العملية في المستشفى إنك كونك يبقى عندك مينتور مش رفاهية أبدا، سواء في الامتياز أو في النيابة بعد كدا لو هتختار تخصص فيه أي intervention مهما كان بسيط هتحتاج مينتور أو سينيور يكون متعاون وبيحب يعلم اللي أصغر منه.

مش عايز أصدمك بس السينيور لو كان شاطر هيوفر عليك كتير، ممكن يقولك معلومة أنت مكنتش هتوصلها بنفسك غير بعد سنين من الشغل والمذاكرة وممكن مكنتش توصلها بدونه أصلا.

مش لازم على فكرة يكون المينتور بتاعك استشاري، ممكن يكون أكبر منك بسنة أو حتى زميلك في الدفعة كل واحد هيعلمك على اد اللي المتاح ليه يتعلمه في المرحلة الحالية، أنا أول واحد شرحلي ازاي نركب central line و Mahurkar حد شاطر كان أكبر مني بدفعتين (مسا مسا يا أشروف لو بتقرأ الثريد 😘).

هتكتشف إن الكتب المصرية -مع احترامي لأساتذتنا المؤلفين الأجلاء- المذاكرة منها هتعمل منك دكتور idiot وإن عشان تبقى دكتور شاطر و sharp لازم تقرأ من كتب أجنبية.. هو دا الأمر الواقع.

هتكتشف إن في حياتك كدكتور امتياز لازم يبقى عندك حاجة اسمها Core book ودا الكتاب اللي حياتك الطبية هتتمحور عليه في أول سنة من الامتياز على الأقل، بجانب side books تاخد منها حاجات محددة.

هتكتشف فيما بعد إن اللي بدأ قبلك في حاجة هيفضل سابقك فيها إلا لو بدأت بعده واجتهدت أكتر منه ممكن تسبقه فحاول تبطل تندب حظك وقوم اتحرك علشان التأخير مش في مصلحتك.

هتكتشف إنك مينفعش تبص حواليك ولا تقارن نفسك بزمايلك لأن كل واحد له مساره الخاص بيه، فحاول تنافس نفسك أنت وتكون أحسن من شخصيتك بتاعة امبارح هتلاقي نفسك سبقت الجميع.

حاول -كراجل- تشيل فكرة الارتباط من دماغك الفترة دي.. معلش بقالك 5 سنين صابر.. خليهم 6 مش هتموت، الارتباط هيعطلك والامتياز دا أهم فترة في حياتك تقريبا (النصيحة دي متنفعش للبنات عموما).

أخيرا.. الامتياز دا ممكن يكون نقطة انطلاقة لكارير ناجح وممكن برده تنام فيه وتصحى تلاقي السنتين خلصوا وأنت معملتش فيهم أي حاجة، فاختار اللي أنت حابب تكونه.

دلوقتي بقى شوية مصادر وترشيحات للفترة الجاية.. بالنسبة للCore book ممكن تستخدم واحد من دول: - Oxford Emergency - Essentials of Kumar and Clark - Pocket medicine دول أحسن حاجة في أول سنة مفيش مانع تستخدم كتاب زي دكتور جايد بس خلي استخدامك ليه مقتصر على إنك تعرف أدوية السوق.

لازم يبقى معاك كتابDifferential Diagnosis علشان البيشنت مش هيجيلك يقولي عندي IE يلا قول لي ال complications.. لا، هيجيلك بأعراض معينة أنت هتبدأ معاه منها، بلاش تغلط الغلطة الشائعة اللي هي هتفترض مرض معين بناء على الأعراض وتمشي في سكة إثباته أو نفيه.

الكتب دي هتريح لك عينيك من السلايدات ذات اللون الأزرق اللي الكتابة فيها بالأصفر. كتب ال DDx اللي أُفضلها شخصيا: - Churchill pocketbook differential diagnosis - Macleod's clinical diagnosis - Symptom to diagnosis اختارلك واحد بس.

كمان لو بتحب السماع (بجانب القراءة مش بديل ليها) اسمع Osmosis clinical reasoning واسمع Lecturio فيCardiac and respiratory examination دول هيريحوا لك ودانك من ريكوردات المحاضرات اللي جودتها سيئة.

أنت محتاج قبل ما تدخل الامتياز تكون بتعرف تعمل 3 حاجات لو دخلت من غيرهم هتتعب جدا وهتكره نفسك: - ECG - CXR - Brain CT على الأقل تكون بتعرف تتعرف على حاجات الطوارئ فيهم، دول ليهم مصادر تانية..

للأسف ال Shortcuts اللي كانت بتحصل أيام الكلية إنك تحفظلك صورتين رسم قلب على صورتين أشعة مش هتنفعك دلوقتي خلاص، أنت هتبقى بتتعامل مع عيان بجد مش بروجكتور.

مصادر لتعلم ال ECG: لو عايز مصدر مجاني ترشيحي الشخصي هيكون كورس ال ECG الخاص ب "Strong Medicine" دي قناتهم على اليوتيوب دور ع البلايليست بتاعة ال ECG. السماع لا يغني عن القراءة كبداية تحل كتاب "John R. Hampton 150 ECG Cases" لو مشوفتش حالات حقيقية بعد ما تحل الكتاب معملتش حاجة.

مصادر لتعلم ال CXR: نفس القناة اللي فاتت دور على بلايليست ال CXR. مصادر لتعلم ال Brain CT: محاضرة مدتها ساعة على قناةNavigating radiology اسمها "introduction to CT Head: Approach and principles" هدفها محو الأمية عن واحد من أعمق أغوار الطب (CT brain).

آخر وأهم حاجة أول حاجة تشغل بالك في أول نزولك للمستشفى هما ال3 حاجات دول: - اتعلم تتعامل مع البشر بمختلف ثقافاتهم وخلفياتهم واعرف ازاي تحتوي البيشنت والريلاتفز. - اتعلم تاخد هيستوري كويس (واللي بيعتمد بشكل كبير على الحصيلة العلمية في دماغك). - اتعلم تعمل Examination صح. بالتوفيق

@Ammar_Negm1 ربنا ينفع بيك ي عمور❤️

@Mahmoud39162571 حبيبي يا شيفو 🖤